2016年11月5日 - 回憶的美好 - 已經消失的曼谷法國菜館

 2016年，先帶過一個朋友去曼谷自遊行，之後佢同另一個朋友吹，促成呢一次既三人自由行。

當然，世事就係咁，呢個新朋友一開始就話要去食法國菜，重指明咗一間酒店既法國菜。

不過上網一查，呢間法國菜係行程前兩年已經執咗，結果變成我要負責搵法國菜館。

酒店方面，同上一次一樣係經做AGENT既朋友介紹、當年重係新開，位於SUKHUMVIT SOI 12既GALLERIA 12，當年來講真係唔錯，雖然係SOI 12好入既地方，不過有TUK TUK SHUTTLE載出入，如果係巷口無車亦可以打電話叫佢哋出來接你返酒店。

可能因為係集團經營既關係，一開始已經好明白外來客有乜需要，所以房內插頭係萬用插，無景觀既問題佢哋亦係每間房都裝咗大型風景相補救。

如果心水清應該記得呢個日子前少少就係當時九世泰皇駕崩既日子，本來預咗失望既，不過泰國政府都好明白旅遊係佢哋經濟命脈，一早就係所有酒店預備咗傳單，講明一家兩好，守喪期間旅客只需要著深色衫同唔好做太出格既娛樂就無問題，反正我都係黑衫黑庫黑鞋渡日既，對我就接近無乜影響啦。

主菜，到埗第二晚既FULL COURSE法國晚餐，去當時位於CHIT LOM GAYSORN VILLAGE後邊既C'EST BON，呢個法文意思即係"IT'S GOOD"，感覺講咗等如無講，不過真如其名，係好既，而且好平，亦可能因為咁做唔住，第二次去想訂已經執咗。當日連單都有影低，3個人架哂先四千七百幾匹，即係每位唔駛三百港紙。

第二日去咗個而家已經唔會再去既小區THA TIAN，以前去因為少人去，而且有大皇宮、有批發小食既鋪可以買平價手信，去WAT ARUN既渡頭亦係呢度；但亦因為咁，MRT伸展到呢度都有站，而且越來越多人去WAT ARUN變裝影相，THA TIAN亦發展成好多甜品店食店既遊客區，因為變成咁所以失咗特意去既意義。

同日晚上，去咗TERMINAL 21一間小本經營既泰菜THE TERRACE，同C'EST BON一樣，都係做唔住無咗，對在曼谷食泰菜我都係主張食小店，啲大型連鎖店好似咩NARA THAI呀、SARVOY呀果啲基本上係旅客化咗既泰菜黎，唔會食到你期待中既真泰國味架。

之後佢哋又港女上身係都要去對住間SWENSEN'S食雪糕，明既，一向睇人講，人講乜咪信乜囉，試吓又無壞既。

離開前夜，又有人港女上身死都要去吓ROOFTOP BAR坐，成就咗全程最低CP值既一餐，其實黃昏開始坐的話我都唔介意，問題係佢哋又唔知訂，結果只係黑麻麻咁坐咗2個鐘，3個人用法國菜嗰餐既價錢只可以一人一杯嘢同一個PLATTER加一個MAIN DISH SHARE…

結果返酒店前都係去咗7-ELEVEN買杯麵凍肉頂肚，我來講就非常後悔。

我話佢哋港女上身係有原因架，話說自由活動佢哋去DMK後邊巿集，明明都無嘢啱，結果都買咗件叫做XXXXL既波衫俾我，算啦，唔駛我出錢，不過呢，明顯係細咗，我而家買既XXXL T都鬆既，呢件叫XXXXL就好似緊身衣咁。

最終回程都係著住呢件波衫，全程叫不過不失啦，但估唔到不足10年所有嘢都消失得一乾二淨…

無架啦，到今日就只有睇吓相回味吓。

2011年10月7日 - 那一次水災前的曼谷公幹 - 離開後水浸到二樓高既工業園

 2009年9月我加入一間電子廠，作為香港總部2個IT部人員之一，而後來我至知道，我既加入其實係公司為咗排除本來唯一果個好食懶飛既無用IT員工。入職後好快就接手哂佢所有工作，得到高層信任，然後呢位仁兄就被迫長時間去深圳沙井工作做嘢，迫佢自己走，不過呢啲嘢同今次無關，不提。

大約到2010年，當時都知生產業係大陸根本做唔落去，所以公司係越南同泰國設廠，將骨幹員工送過去訓練當地人，要將生產線移去呢兩個地點既廠房，而我當然要幫手，當年根本未有ZOOM之類既VC服務，要開VC必需要自家買VC系統，慳錢就建立VPN連結，但為穩定就要租專線，當年我其中一個職責就係呢套VC同埋連結既MPLS合約。

當時廠既老闆係一家人，其中一個就去咗泰國，除咗睇住開廠之外就係日日打GOLF，但始終都係會悶既，所以佢就趁住我要去公幹呢，就預先叫我要幫佢做一樣嘢：佢叫師機係佢屋企拎咗五十多隻DVD，要我轉成可以用佢台NOTEBOOK接上電視睇，所以係出發前個幾星期，就係公司不停咁將佢啲DVD轉成ISO抄入PORTABLE HDD，整個USER GUIDE - 佢講到明係要唔識字睇咗都要識播到DVD去佢部電視，所以連帶要影好多相CAP好多SCREEN去造呢個說明。

由於呢個似乎先係呢次BUSINESS TRIP既實體，去果邊要做公司既嘢反而唔多，所以時間上其實同我而家去曼谷玩既時間相似，星期五到埗星期日走，短短一個週未，因為香港有個好煩既BACKUP系統，每星期都有十多盒帶要換所以自己都唔夠膽留太耐。

起程果個星期，係香港既老闆 - 即係當時在泰國果位既妹 - 神神秘秘問我，話你去得3日，其實都用唔哂20KG架啦，我就問佢想點，原來呢，泰國係種唔出介蘭既，要入口同埋當時無可能就咁係街外買到，所以就佔用咗我果20KG成箱介蘭送過去，佢自己都知咩事，講明去機場BAG DROP同去到搬都唔駛我做，咁就算啦。

題外講講，當年我用既ANDROID係我好鍾意既機，雖然係好初期既，雖然而家已經無人造有實體KEYBOARD既電話，不過呢個真係我心頭好，俾大家睇睇：

同幾十年前初代GSM無線電話一樣，初代既ANDROID電話一樣面對重量同電池續航不足既問題，一日要用到晚的話要帶住兩三舊電，當年係無尿袋你充住用呢回事，所以當年因為呢個問題，第二亦因為同老闆與及好多同事一齊，無必要好難影相，所以呢個紀錄係講多相唔多。

話明公幹重要帶20KG貨就當然唔會係廉航啦，呢世人第一次坐泰航就係呢次啦。

其實第一日係接近浪費哂，因為朝早要返公司做埋手尾，之後師機送去機場都成11點，係Suvarnabhumi機場見到接我既師機都三四點，之後曼谷北方工業園既高速公路一啲都唔高速 - 無錯，廿幾年前曼谷已經塞車為患，當日去到工業區旁老闆既別墅已經係十點上下。

工作果啲嘢就唔提啦，星期六中午老闆帶我同幾個大陸調過去既同事就去咗我人生第一次既OR TOR KOR MARKET食中午飯。

之後就去旁邊既JJ MARKET，原來當年泰國人已經知道要"特別招呼"中国人，大量標語叫佢哋小心(唔好整爛嘢、唔好店內食煙、小心衛生等)。

之後佢哋SHOP完就車去會合其他員工，去咗間叫金雞既菜館。

當年都未興相機食先，所以當時影既都係同事，所以就唔係呢度放佢哋既相啦；最記得呢，就係老闆自覺好錫我，就將幾窩TOM YUM GONG既蝦都俾哂我，但其實呢，啲蝦本身只係要佢既蝦油，香味去哂個湯度，蝦既本體車胎咁硬，好辛苦先食得完嗰6隻大蝦…

一夜無語，就星期日，朝早執好嘢就去機場，事前有個舊同事叫我幫手換錢話SUPERRICH個價靚，當年我就傻傻咁照問，真係估唔到去到回程之前先中雷。

中咩雷呢，工業區去機場條路根本唔會經過水門，當年SUPERRICH亦無分店，所以老闆一聽到係PRATUNAM就跳制插我："你傻架，啲油唔駛錢架，爭果0.02就走咁遠，你換幾多我叫同事而家照價換俾你！"

雖然話係中雷啦，但呢次亦教識我所謂平唔單係計面價，車程當然係一回事，但係呢啲短TRIP時間先係一個好重要既COST，就以呢次為例，如果堅持要去換錢，油錢之外重要預多個多鐘頭車程，又要排隊，最傻既係我當時唔知SUPERRICH星期日係唔開既，即係話去到係白行。

搞掂哂，終於要告別泰國廠房。

其實全個TRIP一到下午就已經會落大雨，但我無為意原來會係咁大件事；返到香港，香港呢邊啲老闆日日都會問嗰邊既情況，原來泰國政府排洪，水就沖去我啱啱先去完既工業區，當時堆哂沙包圍哂板都無用，水浸到二樓高，間廠投產無耐就TOTAL LOST。

其實我有大量當年水浸後既相，不過只放一張俾你睇吓當時既水位係浸到幾高。

我講呢件事我估大家都無乜印像，但如果當年已經有用電腦有砌機的話，應該好清楚記得2011年尾HDD既價錢由幾百一隻500GB升到千五都攞唔到貨。

因為當時世上3大硬盤企業不約而同都將生產線搬咗去曼谷北面既工業區，當時我公司就係代工TOSHIBA HDD既，係工廠出來行一圈，TOSHIBA本業既貨倉，SEAGATE同WD既廠房全部都係十步之內。

即是泰國政府一個排洪既決定就將全世界可用既HDD沖哂落河。上邊呢啲相係當時水退即時入去拍既，作為CLAIM保險既證據。

由於泰國政府呢種魯莽既決定，年多後保險陪咗錢都無再係泰國重建廠房，只留返個殼係度等搞執笠。

我亦無藉口去曼谷，到後來離職先自己自遊行。

2011年泰國水災